Breaking News

ಕೊರೋನಾ ಹುಟ್ಟು..

ದಕ್ಷಿಣ ಕೊರಿಯಾದಲ್ಲಿ ಮೊದಲ ಕೊರೋನಾ ಕೇಸ್ ದಾಖಲಾದದ್ದು ಜನವರಿ 20ರಂದು. ವುಹಾನ್‍ನಿಂದ ಸಿಯೋಲ್‍ಗೆ ಬಂದಿಳಿದ 35 ವಯಸ್ಸಿನ ಮಹಿಳೆ ಮೊದಲ ಸೋಂಕುಪೀಡಿತೆ. ಆಕೆಯನ್ನು ದಿಗ್ಬಂಧನದಲ್ಲಿ ಇಡಲಾಯಿತು. ಅಲ್ಲಿಂದ ಮುಂದಕ್ಕೆ ಅಲ್ಲೊಂದು ಇಲ್ಲೊಂದು ಎಂಬಂತೆ ಪ್ರಕರಣಗಳು ದಾಖಲಾಗುತ್ತ ಹೋದವು. ಆದರೂ ಮುಂದಿನ ನಾಲ್ಕು ವಾರಗಳ ಕಾಲ ಕೊರಿಯಾದಲ್ಲಿ ಕೊರೋನಾ ಸೋಂಕಿತರು ಎಂದು ಗುರುತಿಸಲ್ಪಟ್ಟವರು ಕೇವಲ ಮೂವತ್ತು ಮಂದಿ ಮಾತ್ರ. ಪರವಾಯಿಲ್ಲ; ಕೊರಿಯಾ ಬಹಳ ಅದ್ಭುತವಾಗಿ ಈ ರೋಗವನ್ನು ನಿಯಂತ್ರಿಸುತ್ತಿದೆ ಎಂದೇ ಎಲ್ಲರೂ ಮೆಚ್ಚಿದ್ದರು. ಜಗತ್ತಿನ ಉಳಿದೆಲ್ಲ ದೇಶಗಳು ಕೊರಿಯಾದ ಸಾಧನೆಯನ್ನು ಮುಕ್ತಕಂಠದಿಂದ ಹೊಗಳಿದ್ದವು. ಚೀನಾ ದೇಶಕ್ಕೆ ಹತ್ತಿರವಿದ್ದೂ ಕೊರಿಯಾ ಪ್ರಬುದ್ಧತೆ ಮೆರೆದಿದೆ; ತನ್ನ ವೈದ್ಯಕೀಯ ಸವಲತ್ತುಗಳ ಔನ್ನತ್ಯ ಸಾಧಿಸಿದೆ; ಕೊರೋನಾ ಸೋಂಕನ್ನು ಹದ್ದುಬಸ್ತಿನಲ್ಲಿಟ್ಟಿದೆ ಎಂದೇ ಎಲ್ಲರೂ ಭಾವಿಸಿದ್ದರು. ಆದರೆ ಆ ಎಲ್ಲ ಕಿರೀಟ, ಬಿರುದುಬಾವಲಿಗಳೂ ನೆಲಕಚ್ಚಿದ್ದು “ಪೇಷಂಟ್ 31” ಮೂಲಕ!

ಯಾರಿದು “ಪೇಷಂಟ್ 31”? ಈ 31ನೇ ಪೇಷಂಟ್, ಡಯೆಗು ಪ್ರಾಂತ್ಯದಲ್ಲಿರುವ “ಶಿಂಚೆಯೋಂಜಿ ಚರ್ಚ್ ಆಪ್ ಜೀಸಸ್” ಎಂಬಲ್ಲಿ ಫೆಬ್ರವರಿ 9 ಮತ್ತು 16ರಂದು ನಡೆದ ಎರಡು ಸಾಪ್ತಾಹಿಕ (ಭಾನುವಾರದ) ಪ್ರಾರ್ಥನಾ ಸಭೆಗಳಲ್ಲಿ ಭಾಗವಹಿಸಿದ್ದಳು. ಆ ಮೂಲಕ 1600ಕ್ಕೂ ಹೆಚ್ಚು ಮಂದಿಯ ನೇರ ಸಂಪರ್ಕಕ್ಕೆ ಬಂದಳು. ದುರಂತವೆಂದರೆ ಈಕೆ ವಿದ್ಯಾವಂತೆ. ಕಾಲೇಜು ಶಿಕ್ಷಣ ಪಡೆದಾಕೆ. ಫೆಬ್ರವರಿ 9ಕ್ಕೆ ಮೂರು ದಿನ ಮೊದಲೇ ಈಕೆ ಒಂದು ಅಪಘಾತ ಪ್ರಕರಣದಲ್ಲಿ ಆಸ್ಪತ್ರೆಗೆ ದಾಖಲಾಗಿದ್ದಳು. ಆ ಹೊತ್ತಿಗಾಗಲೇ ಆಕೆಗೆ ಜ್ವರವಿತ್ತು. ವೈದ್ಯರು ಆಕೆಗೆ ಕೊವಿಡ್-19 ಪರೀಕ್ಷೆ ಮಾಡಿಸಿಕೋ ಎಂಬ ಸಲಹೆಯನ್ನೂ ಕೊಟ್ಟಿದ್ದರು. ಅದನ್ನಾಕೆ ನಿರಾಕರಿಸಿದಳು, ಇಲ್ಲವೇ ಉಪೇಕ್ಷಿಸಿದಳು ಎನ್ನೋಣ. ಆಸ್ಪತ್ರೆಯಲ್ಲಿ ಒಂದು ದಿನವಷ್ಟೇ ಉಳಿದುಕೊಂಡು ಆಕೆ ಮರುದಿನ ಮನೆಗೆ ವಾಪಸಾದಳು. ಅದರ ಮರುದಿನ ಚರ್ಚಿನ ಪ್ರಾರ್ಥನೆಯಲ್ಲಿ ಪಾಲ್ಗೊಂಡಳು. ಫೆಬ್ರವರಿ 10ಕ್ಕೆ ಜ್ವರ ಮತ್ತೆ ಉಲ್ಬಣಿಸಿತು. ಆಸ್ಪತ್ರೆಗೆ ದಾಖಲಾದಳು. ವೈದ್ಯರ ಸಲಹೆಯನ್ನು ಮತ್ತೆ ಗಾಳಿಗೆ ತೂರಿ ಫೆಬ್ರವರಿ 15ರಂದು ಒಂದು ಹೊಟೇಲಿನಲ್ಲಿ ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಂಡಳು. ಬುಫೆ ಊಟ ಮಾಡಿದಳು. 16ರಂದು ಮತ್ತೆ ಚರ್ಚಿನ ವಾರಾಂತ್ಯದ ಪ್ರಾರ್ಥನೆಯಲ್ಲಿ ಪಾಲ್ಗೊಂಡಳು. ಮತ್ತೆ ಸಾವಿರಾರು ಮಂದಿ ಆಕೆಯ ಸಂಪರ್ಕಕ್ಕೆ ಬಂದರು. ಅದಾಗಿ ಮರುದಿನ ಜ್ವರ ಮತ್ತೆ ಹೆಚ್ಚಿತು. ಮತ್ತೆ ಆಸ್ಪತ್ರೆ. ಈ ಸಲ ಕೊರೋನಾ ಸೋಂಕಿರುವುದು ದೃಢಪಟ್ಟಿತು. ಕೂಡಲೇ ಕ್ವಾರಂಟೈನ್ ಮಾಡಲಾಯಿತು.

“ಶಿಂಚೆಯೋಂಜಿ” ಚರ್ಚಿನ ವಿವಿಧ ಕಾರ್ಯಕ್ರಮಗಳಲ್ಲಿ ಆ ಎರಡು ವಾರಗಳಲ್ಲಿ ಪಾಲ್ಗೊಂಡ ಒಟ್ಟಾರೆ ಜನರ ಸಂಖ್ಯೆ 9300ದಷ್ಟು. ಅವರೆಲ್ಲರನ್ನೂ ಸಂಪರ್ಕಿಸಿ ಪರೀಕ್ಷೆಗೊಳಪಡಿಸಿದಾಗ ಅವರಲ್ಲಿ 1200 ಮಂದಿಗೆ ಕೊರೋನಾ ಸೋಂಕು ತಾಗಿರುವುದು ದೃಢಪಟ್ಟಿತು. ದಕ್ಷಿಣ ಕೊರಿಯಾದಲ್ಲಿ ಅದುವರೆಗೆ ದೃಢಪಟ್ಟ ಕೊರೋನಾ ಪ್ರಕರಣಗಳಲ್ಲಿ 60% ಭಾಗ ಕೇವಲ ಈ ಒಂದು ಚರ್ಚಿನಿಂದ ಬಂದದ್ದು. ಮತ್ತು ಅವಷ್ಟೂ ಪ್ರಕರಣಗಳಿಗೆ ಹೇತುವಾದದ್ದು “ಪೇಶಂಟ್ 31” ಎಂಬ ಕೇವಲ ಒಂದು ವ್ಯಕ್ತಿ.

ಇವತ್ತು ಕೊರಿಯಾದಲ್ಲಿ ಕೊರೋನಾ ಸೋಂಕಿತರ ಸಂಖ್ಯೆ 9000ಕ್ಕೂ ಹೆಚ್ಚು. ಅವರಲ್ಲಿ ಆರೂವರೆ ಸಾವಿರ ಮಂದಿ ಡಯೆಗು ಪ್ರಾಂತ್ಯದವರು. ಈ ಇಡೀ ರಾಜ್ಯವನ್ನೇ ಕೊರಿಯಾ “ಸೋಂಕಿತ”, “ನಿಷೇಧಿತ” ಎಂದು ಘೋಷಿಸಿ ದೂರವಿಟ್ಟಿದೆ. ಈ ಊರಿನವರು ಹೊರಹೋಗುವಂತಿಲ್ಲ. ಇಡೀ ರಾಜ್ಯಕ್ಕೆ ರಾಜ್ಯವನ್ನೇ ಕ್ವಾರಂಟೈನ್ ಮೋಡ್‍ಗೆ ತಳ್ಳಲಾಗಿದೆ. ದಿನದಿನವೂ ಸೋಂಕಿನ ಸಂಖ್ಯೆ ಹೆಚ್ಚುತ್ತಲೇ ಹೋಗಬಹುದು. ಸಾವುಗಳೆಷ್ಟೋ ಲೆಕ್ಕವಿಲ್ಲ.

ಈ ಪ್ರಕರಣದಿಂದ ಪಾಠ ಕಲಿಯುವುದಿದ್ದರೆ ಕಲಿಯಿರಿ. ಇಲ್ಲವೋ ದೇಶವನ್ನೇ ಸ್ಮಶಾನವಾಗಿಸಿ ನೀವೂ ಸಾಯಿರಿ.

#Covidiots

Source: Wtsapp

Leave a Reply

Your email address will not be published. Required fields are marked *

*